បុរសវ័យ៥៧ឆ្នាំម្នាក់ត្រូវជនមិនស្គាល់មុខកាត់កសម្លាប់ដោយសារទាស់ពាក្យសម្តីគា្ននៅឃុំសន្ទ្រែស្រុកភ្នំក្រវាញ
25-August-2018 | ដោយ ពលមនសិការ
ពោធិ៍សាត់៖ បុរសវ័យ៥៧ឆ្នាំម្នាក់ ត្រូវបានជនមិនស្គាល់មុខធ្វើឃាតដោយកាត់កសម្លាប់នៅវេលាម៉ោង ៩និង ៣០នាទីព្រឹក ថ្ងៃសុក្រ ១៣កើត ខែស្រាពណ៍ ឆ្នាំចសំរឹទ្ធិស័ក ព.ស២៥៦២ ត្រូវនឹងថ្ងៃទី២៤ ខែសីហា ឆ្នាំ២០១៨ នៅចំណុចស្ទឹងរលាបព្រក ស្ថិតនៅភូមិក្សេត្របូរី ឃុំសន្ទ្រែ ស្រុកភ្នំក្រវាញខេត្តពោធិ៍សាត់។
បើតាមការបំភ្លឺពី ឈ្មោះ យ៉ម ហុន ត្រូវជាប្រពន្ធរបស់ជនរងគ្រោះ និង ឈ្មោះ អឹម សុខា ជាប្រជាពលរដ្ឋនៅក្នុងភូមិបានប្រាប់ឲ្យដឹងថា ករណីឃាតកម្មនេះបណ្តាលទំនាស់ពាក្យសម្តី ដែលពាក់ព័ន្ធនឹងជនសង្ស័យចំនួន០៣នាក់៖ ទី១-ឈ្មោះ សយ សី ភេទប្រុស អាយុ៣៥ឆ្នាំ រស់នៅភូមិបឹងព្រៃ ឃុំត្រពាំងជង ស្រុកបាកាន ខេត្តពោធិ៍សាត់ ទី២-ឈ្មោះ អុក ភេទប្រុស រស់នៅភូមិឃុំជាមួយគ្នា និងទី៣-ឈ្មោះ ធា ឃុំបឹងខ្នា ស្រុកបាកាន ខេត្តពោធិ៍សាត់។
លោកវរសេនីយ៍ទោ តាន់ គារិទ្ធ អធិការនគរបាលស្រុកភ្នំក្រវាញបានឲ្យដឹងដែរថា ជនរងគ្រោះឈ្មោះ ម៉ែន ថា ភេទប្រុស អាយុ៥៧ឆ្នាំ រស់នៅភូមិត្រាំងសេះ ឃុំបឹងបត់កណ្ដាល ស្រុកបាកាន ខេត្តពោធិ៍សាត់។
ក្រោយពីសមត្ថកិច្ចជំនាញស្រុកដឹកនាំដោយលោកអធិការសហការជាមួយកម្លាំងជំនាញនគរបាលខេត្តបានចុះដល់កន្លែងកើតហេតុ ធ្វើការពិនិត្យនិងស្រាវជ្រាវ រួចសន្និដ្ឋានបានថា ករណីឃាតកម្មនេះបណ្ដាលមកពីទំនាស់ពាក្យសម្ដីគ្នាពិតប្រាកដមែន។ លោកអធិការបានបន្តថា សមត្ថកិច្ចនគរបាលជំនាញកំពុងតែ តាមចាប់មុខសញ្ញាជនសង្ស័យទាំង០៣នាក់ បញ្ជូនទៅតុលាការដើម្បីផ្តន្ទាទោសទៅតាមច្បាប់ ៕
ចំនួនអ្នកទស្សនា
- ថ្ងៃនេះ2931
- ម្សិលមិញ16391
- សប្តាហ៍នេះ49161
- ខែនេះ164311
- ឆ្នាំនេះ164311
- សរុប20606767